الاثنين، 6 ديسمبر، 2010

ينفع كده!!!!

هو ينفع كده....ولايبقالنا صوت ولا نده
ونعيش ونموت ولا لصوتنا صدى
امال ايه الديمقراطية اللى بيقولو دى حق لنا؟؟
ولا هو كلام وبس اللى فضلنا
عارفين عايزين ايه عشان ينقذ بلدنا؟؟؟؟؟؟؟
عايزين معجزة تنزل علينا من السما
معجزة تقلب الاحوال او ممكن حد بتاع جلاجلا
يحول العجوزة صبيا ويعيد من عمرها 25سنة
عشان تعيد حسابتها وتعمل وقفه بجد بقى
وقفه تشفع ليها قدام ملايين الالسنة
الالسنة اللى دابت ونشفت من كتر الدعا
بس يا ترى الدعا للصبيا ولا عليها من اعمالها المنيلة
وكل عمله والتانيةولا ليها حل ولا ليها اجوبة
اخرها كل اللى بيحصل من انتخابات او زى ما بيقولواسمها
لكن فى الحقيقة دى اسمها مهزلة..بلطجة.. بهدلة
ومش عايزة اتكلم عنها عشان الضغط عندى علا
بس ما الاخر .........
يعنى يا صبيا ينفع كده؟؟؟؟؟؟

الاثنين، 1 نوفمبر، 2010

فوق من وهمك

فوق من وهمك......انا مش هفضل عمرى احبك.....انا قلبى ماهواش من حقك


فوق من وهمك....انا نجمى مش عاشق سهرك.....انا قمرى مسيره يفارقك


فوق من وهمك....لا انا دايب فى الهوا ولا حبك....لا انا ناسى الالام ولاجرحك


فوق من وهمك....انا عمرى خلاص بقى مش ملكك....انا زمنى هيفوت من بعدك


فوق من وهمك.....دا انا ياما اسيت اوى من هجرك....وخلاص بعت الحب وبعتك

الخميس، 21 أكتوبر، 2010

انتخابات

قال بيقولو انتخابات
ده وجع فى الراس وبات
وناس شغالة تطلع
عماله تقول حاجات
واللى كلامه ممكن 
واللى كلامه اشتغالات
واللى بيقول انا ممكن
اجيب للناس بلح امهات
واللى عمال بيوعد الشباب 
وكمان البنات
بالشغل والبيت والعروسة
والتبات والنبات
وهو ولا له فيها
ده اصلا من ابو تلات
كان بياع بطاطا وسارح
وبقى بيه بببيونات
غرقان فى بدل وجرفتات 
وحفلات وشاليهات

وتلاقيه زى القرادة
مسك فى الكرسى لحد الممات
ويروح ونقول كان تعلب
لكن مكار ....  وفات
لكن بييجى بعده
لفات ورا لفات
ويعيش المواطن غلبان
ويقولو......... ضحية انتخابات

السبت، 9 أكتوبر، 2010

من غير كلام

قابلتك وكلى حنان
          وعنيك قالتلى كلام
ساعتها انا قلت حبيبى
         فى حبك ياسلام

نسيتنى ساعتها روحى
                 وانا قلت بلاش تروحى
ولقتنى دايبة حبيبى
              فى احلى حنين وغرام
           
اخدت عنيك فى حضنى
           وهواك بيقولى خدنى
معرفتش يومها حبيبى 
        اغمض عنيا وانام
 
ولقيت قلبك وحشنى
                     و هواك من الشوق حايشنى
وانا قولت لك حبيبى 
           لكن.........
من غير كلام

الأربعاء، 15 سبتمبر، 2010

اصعب لحظة

كانت اصعب لحظة
مرت يا قلبى عليا
لحظة ماقلبه قسى وبكى دموع عنيا
لحظة ما قلبه نسى سهر ايامى ولياليا

 لحظة مرت فى لحظة
وسابتلى جراحى المرة
لحظة عدت ومرت 
لكن جراحها باقيه

جراح مش اى جراح
تنسى اجمل افراح
وتقسى القلب الطراح بالحب وبالحنيه
 
جراح كانت لى صدمة
وبقت لحياتى دنيا
مع انها عنده هو..........

كانت مجرد لحظة..........!!!!!

السبت، 11 سبتمبر، 2010

كل سنة وانتم طيبين
وبالعيد معيدين
 وبالكحك مبسوطين
وبالهدايا باعتين وواخدين

 وفين عيدية جنى بقى؟؟؟

الثلاثاء، 10 أغسطس، 2010

رمضان كريم

السلام عليكم ورحمة الله وبركاته
اتأخرت عليكم كتير لكن بجد وحشتونى اوى يا ولاد الايه!!!!!!
بس للاسف انا جيه اقولكم كل سنة وانتم طيبين
وشكرا
بصراحة رمضان عايز تفرغ تام
وانا يادوب عليا البيت والعيال
لكن قولولى
حد جاب فانوس؟؟؟؟؟؟؟؟
وياترى صينى
ولا مصرى من ابو شمعة؟؟؟؟؟؟؟؟
كل سنة وانتو طيبين
وربنا يعينا على الاسعار 
واللى لسه ما قالش لمامته وباباه
كل سنه وانتو طيبين 
يجرى بسرعة ويبوس ايديهم
ولايرفع سماعة التليفون ويقولهم
ويطلب دعاهم
الله ما يحرم حد من حبايبه

الخميس، 22 يوليو، 2010

اريد حلا

اريد حلاااااااااااا

يا جماعة حد يلحقنى!!!!!!!!!
الصورة صغيرة اوى فى الكمبيوتر بتاعى
حتى لوحة التحكم
حد عنده حل؟؟؟؟؟؟؟؟؟؟
ويبقاله الاجر والثواب عند الله
ورمضان كريم

الأحد، 11 يوليو، 2010

عاشت الاسامى

وحشتونى
انا بحتفل يا جماعة بعيد ميلاد امى
الله يخليهالى يارب
وما يحرمنيش منها
ولا من دعواتها
حاولت اعبر عن اللى عاملته معايا 
من خلال بعض الكلمات
وانا عارفه مهما عملت 
لا يمكن اقدر اوفيها 
حقها


عاشت الاسامى
عاشت الاسامى يا حب غالى 
عاشت الاسامى يا حب الليالى
عاشت الاسامى كل الاسامى
واسمك عندى هو اللى باقى
يا أمى
عاشت الاسامى يا حب السنين
يا قلب كله شوق وحنين
وعيون تسهر ليوم الدين
تداوى جرحى وتشيل الهم من ع بالى
يا أمى
عاشت الاسامى يا حب العمر
عاشت وعاش لعنيكى الصبر
تسهر بالليل وتدعى الفجر
بالخير قلبك كان بيدعى وناوى
يا أمى
عاشت الاسامى ياحب حياتى
يا غرامى وهيامى اللى كان والاتى
وبدموع عنيكى تفدينى ليلاتى
واتمنى يجى يوم وتطلبى ولو تخدى.......
عينى.... يا أمى

الأربعاء، 7 يوليو، 2010

حبك عالم

حبيبى حبك عالم
عايش له قلبى الهايم
ورمشى ولا عمره نايم

وتملى سهران لياليك

اسمع حكاوى العالم
اتوه فى ليل غايم
ويجيلك قلبى عايم

فى بحور رموشك وعنيك

وبقول انا قلبى نادم
عن كل لحظة كان فيها نايم
يحبك حبيبى ويكونلك عالم 

ويعيش لك ويكون حواليك

الأحد، 4 يوليو، 2010

انا حبيت

حبيته من سنين                
          وفى بعده بدوب حنين
وفى قربه انا قلبى خايف
            يرجعلى بشوق حزين
حبيت فيه الحنان
             ومعاه كل الامان
وأديتله قلبى وحبى 
              ونسيتهم من سنين
أنا عشت بقلبى لحبه
          وأتمنى أموت وأنا جمبه
أو أقضى من عمرى بقربه
           ان شا الله يكون يومين
حفرت فى قلبى أسمه
            وعيونى عشقت ملامحه
وشفيفى لو جت سيرته
               بتدوب من كلمتين
أتعلمت منه الهوى
                  وشوق عنيه وأحنا سوا
وكلامهم لما يقولى أنا
                 حبيتك من سنين......

الخميس، 1 يوليو، 2010

عيد جوازى

بركولى ..........هنونى...........زغلطولى
انا بحتفل بعيد جوازى التانى
 تخيلو
الايام الحلوة بتعدى بسرعة
فعلا عمر الانسان بيتحسب بالايام الحلوة فى حياته
يعنى انا اصغر مدونة عندى سنتين وبس!!!!!!!!!!
بتمنى لكل البنات ان
ربنا يعفهم
ويرزقهم بالزوج الصالح
بس بقلكو ايه؟؟؟؟؟؟؟؟
مش عايزين حسد وقر ونق
افرحولى من قلبكو 
لانى 
بحبكو
ودلوقتى بهديكو اغنيه
بحبها وبتفكرنى بوعود  وعدناها لبعض من اول يوم

الخميس، 24 يونيو، 2010

مع انى

مع انى كنت عنده شاريه طول الزمان
مالقيتش فى حبى ليه غير جرح قلبه اللى خان
خايف لبأيدى ارجع وأمشى معاه الطريق
نادم لو عينى لمحت فى عنيه لمسة حنان

دايب من دمع عينى ينزل يجرى فى وريدى
واتارى كل دمعة نزلة تطفى شموعى
ولقيت حتى شمعى سبب فى عمرى حريق
عارف لو أطفى ناره هيمحى كل اللى كان

لكنى لسه عايز يكونلى ذكرى منه
نظرة..كلمة..ابتسامة او كلمة قالوها عنه
زى ما قالو انه عاشق وهيكون لقلبى رفيق
واتاريه لقلبى ناوى ينسيه طعم الامان

مع انى كنت عنده شاريه طول الزمان

السبت، 19 يونيو، 2010

حصة عربى


زمان سنة 1980 كان درس العربى فى المدرسة
للمرحلة الابتدائية كده!!!!!!!!
اما نفس درس العربى بس لسنة 2010
لنفس المرحلة بقى :
ذ ل
كسر
هدم

تفتكروا ايه الفرق؟؟؟؟؟؟؟؟؟؟؟؟؟

الثلاثاء، 15 يونيو، 2010

الحساب على مين




مش عارفة ابدأ منين ولا أقول مين ولا مين
مش عارفة مين هيحاسب على حقوق الملايين

على مين حق خالد اللى قتله اثنين مخبرين
وقالو ده اصله شارب بانجو ولا حشيش متين
وياعينى داشاب طيب لا له لا فى الطور ولا فى الطحين
يبقى الحساب على مين؟؟؟؟؟؟؟؟؟؟
على مين حق مروة الشربينى اللى ماتت 
على ايد سفاح لعين
وطعنت طعنتين طعنة فى جسدها 
وطعنة فى قلب المسلمين
يبقى الحساب على مين؟؟؟؟؟؟؟؟؟؟؟؟؟
ولا الشباب اللى عايز يقول كلمة حق ومش عارفين
من الامن اللى مفروض يحرسهم وعلى أنفاسهم 
كاتمين ومريحين
طب والحرية اللى بتقولو عليها ولاهو كلام مجانين
يبقى الحساب على مين؟؟؟؟؟؟؟؟؟؟؟؟؟
وحق الشباب اللى من المستقبل يائسين
ومن الامتحانات بأمان مش حاسين
ده لان اللى حاطين الامتحانات بصراحة
مهيسين
ولا يمكن هما اللى بالبانجو شاربين ومضيعين؟
 
بعد ده كله حد يقولى 
الحساب على مين؟؟؟؟؟؟؟؟؟

السبت، 12 يونيو، 2010

مين فينا

مين فينا يا قلبى اللى باع...وعاش لحظات وداع.
مرت سنين ضياع
والتانى ولا قدر

مين فينا يا قلبى اللى خان...أشواق نظرات تبان
وقلوب تقول كمان 
مالحب والمتقدر

مين فينا يا قلبى اللى غاب...وفات وراه سنين عذاب
عاشت باسم هواه الكداب
ولا كنت يوم اتصور

مين فينا يا قلبى اللى نسى...حبه الكبير وقلبه قسى
وحبيبه تاه وهو رسى
وفات حب زى المرمر

مين فينا يا قلبى اللى جرح...فاز بعمره سرور ومرح
وكأنه ورد بشوك وطرح
لكنه خسر شىء اكبر

خسر قلب بيحبه.. وعاش العمر جمبه.. ويتمنى لحظة قربه
ولو اتخير بين الدنيا وقلبه
يختار قلبه مش اكترّ!!!

الأحد، 6 يونيو، 2010

التاج السلطانى

التاج السلطانى
النهاردة وصلتنى هدية غالية من اخ غالى  مدونة (ابتسامة عيون)
وبصراحةانا كنت مترددة ولكن يلا نفضح الدنيا هو انا يهمنى.
بنود التاج:


1- أذكر اسم من طلب منك حل هذا الواجب.
2 - تحدث عن ستة أسرار قد لا يكتشفها من يقابلك للمرة الأولى.
3 - حول هذا الواجب إلى ستة مدونين، واذكر أسمائهم مع روابط مدوناتهم في موضوعك.
4 - اترك تعليقا في مدونة من حولت إليهم، ليعلموا عن هذا الواجب.
ونبدأ ونقول بسم الله :
السر الاول :مكنتش اعرف انى فى الرحلات بتجينى شراهة فى الاكل
قدرا كنت فى رحلة  مع اصدقائى ومعرفوش ياكلوا حاجة يا عينى.
السر الثانى:اول انطباع عندى هو اخر انطباع وعمرى ما بكون غلط
ابدا وده يودينا للسر اللى بعده.
السر الثالث: احساسى بالشخص اللى قدامى  دايما فى محله 
يعنى يا أرتاح يا مرتاحش.
السر الرابع:اللى يشفنى لاول مرة يفكرنى هادية اوى او مغرورة
لكن لما يعرفنى كويس يلاقينى متكلمة جدا واجتماعية اوى.
السر الخامس:اكتر من حد ابو اعجابهم بشخصيتى القوية 
مع انى بحس انى مترددة شوية وكتير بلوم نفسى على افعال كتير.
السر الاخير ان ان ان  تشششششششششششش
غيورة بصراحة على زوجى وعلى اى حد بحبه 
من اول اهلى واصحابى  ورسولى.
وفى النهاية يارب مكنش دمى تقيل على قلبكم لانى بحبكم.
واهدى التاج الى :
مدونة النهار
مدونة موناليزا
مدونة كلمات من نور
مدونة ما كفاية بقى
مدونة غروب 
مدونة خواطر شابة

  واسفة لان كان نفسى اهدى التاج لكل حبايبى.
وتلبية لرغبة اختى الصغيرة زهرة الاسلام
بكل فخر بنزل الفيديو ده.
 
انا متاكدة ان الفيديو هيعجبكم وبهدي لكل زائر للمدونة واتمنى نشرة فى كل المدونات
وكل الدنيا.

الأربعاء، 2 يونيو، 2010

حروف اسمك

حروف اسمك حبيبى
       
                                اجمل حروف فى الكون

حروف جوا قلبى

                        ومعايا منين ما أكون

اول حرف ميم :

مين ميحبش حبيبى ويعيش له فين ما يكون

وتانى حرف فين :

حطيته جوا عيونى وداريته بالرمش والجفون

وتالت حرف زين :

مفيش احزان من بعدك لا كانت ولا هتكون

واخر حرف منين :

ده يمكن من القمر ولا يمكن مالنجوم

حروف اسمك حبيبى كل حرف فى كلمتين :

م             ملكت قلبى

ح             حكمت عليه

م           مفيش غيرك

د           دأنت اللى ليه

الخميس، 27 مايو، 2010

حبيبتى يوم عيد حبها

جت وباين احلى فرحة ساكنة جوة فى قلبها
جت تقول كلام كتير عن حبيب عمرها
جت وسابت جوة قلبى احلى ذكرى لحبها

حبيبتى يوم عيد حبها

حكت كتير عن شوقها له وكمان شوق قلبه لها 
ونسيت معاها كل الامى وجراح قلبى وقتها
خليتنى اقول لسه الحب والحنان عايشين ليها وحدها

حبيبتى يوم عيد حبها

واتمنيت احلى الامانى ودعيت تكون من حقها
واتمنيت له كمان كتير لانه كريم فى حبها
وحلمت بيهم ويا بعض وقفه وهو جمبها

حبيبتى يوم عيد حبها

الأحد، 23 مايو، 2010

حكاية بنت


كان هو حبيب قلبها...والسر اللى فى عمرها
والنجم اللى بامرها
نزل
وعاش ع الارض

كان عمره عايشه ليها...كان يتمنى تراب رجليها
كان بيحلم يمر طيفه قدام عنيها
لكنه رمى بالحب طول وعرض

وهى شافته فى الليل حلمها...وبقى فى نن عنيها ضيها
وبقى هو نسمها ووردها 
ونسيت ان اصل الشوك فى الورد

وكان بيقول روحى انا فيها...وبحلى مرارى بيها
وعمرى ماهبعد عن اراضيها
لكنه بان من طول البعد

كانت فكراه الفارس اللى جاى يخطف قلبها
لكنه خطف منها ثقتها فى نفسها
لكنها بدأت تفكر وتستعمل عقلها

وبدأت تعمل لحياتها جرد



الجمعة، 21 مايو، 2010

اننا مفترقين

حبيبى.. منذ التقينا ايقنت اننا مفترقين
 
فذهبت ابحث عن حبك ما بين السماء والنجمين
 
فلم اجد الا سراب يلاحقنى وخيال ووهم اصمين
 
فيأست..يأست من التلاقى وارهقتنى دموع العين
 
لكنى لازلت احيا وسأموت على ذكرى حبيبين
 
تجمعت روحاهما ولكن القدر لم يشأ ان يجمع الجسدين
 
وسيفترقا وتميد بهم الارض طويلا ويعيشا هائمين
 
ولكن الحب فى قلبيهما لن ينتهى بل سيدوم حتى خروج الروحين 
 
حتىيظنا الا تلاقيا وانهما يقينا....... مفترقين

الثلاثاء، 18 مايو، 2010

ايه هو المنطق؟

لما شاب عشان يكون نفسه يقعد سنين قبل ما يلبس دبله..
هو ده المنطق؟
لما بنت تكون جميلة ومتعلمة ومن عيلة ومتلقيش فستان ولا طرحة
هو ده المنطق؟
لما راجل عشان يأكل عيلته يجيب عيش مالفرن ويموت مالقهره
هو ده المنطق؟.
لما ست عيشة على عيالها وبتبيع كل ماعندها عشان تعيش لفترة
هوده المنطق؟
لما طفل يروح مدرسته يتعلم ولا يخنق نفسه فى فصل فيه 50 طفلة
هو ده المنطق؟
لما شاب يقضى عمره فى التعليم ويتخرج ميلقيش غير القهوة
هو ده المنطق؟
لما 10 من احسن شبابنا عبقرة ويحاولو ينتحرو من فوق القمة
هو ده المنطق؟
لما سايح يجى البلاد دى يتفرج ويزور اثارها ويشوف زبالة فى كل ناصية
هو ده المنطق؟

لما بنت عشان توصل بيتها تركب 30 مواصلة وتتعرض لمعاكسة وغيرها
هو ده المنطق؟
لما ست عايزة تأكل اسرتها عشان تروح السوق عايزة قرض ولا سلفة
هو ده المنطق؟
لما راجل مريض وفقير عيز يتعالج فى التأمين ويروح يودع اهله قبلا


هو ده المنطق؟
ولما اروح اصوت واختار النائب المناسب ليا والاقى واحد ولا اعرفو بالمرة
هو ده المنطق؟
ولماااروح له فى مظلمة الاقيه مسافر امريكا ولا سويسرا
هو ده المنطق؟
ولما فلسطين تكون عربية ويحتلها ده وده وده وده وده وده
هو ده المنطق؟
ولما العرب يكونو تيهين عن الحقيقة ومطنشين ولا فى غفلة
هو ده المنطق؟
حد عرف ايه هو المنطق ؟؟؟؟؟؟؟؟؟

الأحد، 16 مايو، 2010

صندل قديم


همسة النهاردة هحكيها عن صديقة ليا ممكن نسميها "ن"كانت صديقتى "ن"على قدر عالى من الخلق والتربية الاسلامية زى معظم البيوت المصرية ومن فترة كبيرة -اثناء الدراسة-كانت تقضى الاجازة الصيفية فى قرية والدها فتعرفت على شاب "ك" وارتبطت به عاطفيا لدرجة انها كانت تسافر لوحدها عشان تقابله اثناء الدراسة وهو احبها واتقدم لخطبتها ولكنه اترفض لانه كان خالى شغل وصغير فى السن فغضبت صديقتى "ن" وقررت استمرار علاقتها بيه من مكالمات ومقابلات الى ان تقدم لخطبتها واحد من العيلة  واهلها وافقوا وهى لضعف شخصيتها وافت لالحاحهم عليها -فى هذة الاثناء كان جارها"م" بيحاول يتقرب ليها من سلامات من الشباك ونظرات معبرة عن اعجابه بيها- واتخطبت وبعد فترة وجيزة من الخطوبة مقدرتش تستحمل وطلبت فسخ الخطوبة وقد كان ,
ورجعت لحياتها الطبيعية وبصراحة عمرى محسيت انها مخنوقة قد الفترة دى ومرجعتلهاش ضحكتها غير لما كل شىء انتهى
نسيت اقولكم فى الوقت ده كان حبيبها الاولانى بيكتب كتابة على بنت خالته-شوفتو حب وولاء اكتر من كدة-وانشغلت "ن"فى .دراستها وسافر جارها المحب الخجول و استمرت الزيارات الاسرية بين العيلتين ونسيت "ن"كل شىء غير انها كانت تحكيلى انها بتحلم دايما انها بتلبس صندل قديم حلم اتكرر اكتر من مرة فكنت اقولها -والله اعلم-انتى هتتجوزى واحد تعرفيه قبل كدة ومش انسان جديد عليكى .
ومرت الايام ورجع العاشق الكتوم وطلب ايديها ووافق اهلها خصوصا انه له مركز مرموق ومعها دلوقتى عمر عنده 5شهور وعايشه سعيدة والحمد لالله وكنت بفكرها من قريب بالصندل القديم فقالت :دا صندل عمرى وعندى منه حته من قلبى.

السبت، 15 مايو، 2010

جنة



جنة
احلم ياقلبى بالجنة ..عيش وحب واتمنى..وباحلى خيال استنى
استنى كل جميل..والدوا لكل عليل..من ربنا العزيز الجليل
فى الجنة
احلم كمان بالاخرة..يكونلك ظل ونخلة..وفى ليلك قمر ونجمة
فى الجنة
اتمنى احلى صحبة..يدولك دفا ومحبة..وتكمل باقى الرحلة
فى الجنة



الثلاثاء، 11 مايو، 2010

مدونتى

  • مدونتى بسيطة كلامها من القلب واتمنى يوصل للقلب